Իրանը պատրաստ է Եվրոպայի հետ քննարկել իրանական միջուկային ծրագրի վերաբերյալ Գործողությունների համատեղ համապարփակ ծրագրի (ԳՀՀԾ) վերականգնման հարցը՝ համապատասխան քաղաքական կամքի առկայության դեպքում:
Այդ մասին ճեպազրույցի ընթացքում հայտարարել է Իրանի արտգործնախարարության ներկայացուցիչ Նասեր Քանաանին:
«Մենք կողմնակից ենք դիվանագիտական լուծմանը: Եթե հակառակ կողմն ունենա անհրաժեշտ քաղաքական կամք, ապա բանակցությունները կարող են ավարտվել ամենակարճ ժամկետում», – Քանաանիի խոսքերն է մեջբերում «Ինտերֆաքս» գործակալությունը։ Իրանի ԱԳՆ խոսնակը նշել է, որ դրա համար անհրաժեշտ է, որ «բոլոր կողմերը…․ վերադառնան գործարքի շրջանակներում իրենց պարտավորությունների կատարմանը»:
2023 թ․ դեկտեմբերին Ատոմային էներգիայի միջազգային գործակալությունը (ՄԱԳԱՏԷ) տարածել էր զեկույց, որում պնդվում էր, որ Իրանը մեծացնում է հարստացված ուրանի պաշարները:
Ինչպես այս տարվա հունվարին հայտարարել է ԵՄ դիվանագիտության ղեկավար Ժոզեպ Բորելի մամուլի քարտուղար Պետեր Ստանոն, սա մեծ անհանգստություն է առաջացնում ԵՄ-ում, և Բրյուսելն անհրաժեշտ է համարում վերադառնալ Թեհրանի հետ կնքված միջուկային գործարքին։
2015 թ. միջազգային միջնորդների «վեցյակը» (Մեծ Բրիտանիա, Գերմանիա, Չինաստան, Ռուսաստան, ԱՄՆ, Ֆրանսիա) և Իրանը ստորագրեցին ԳՀՀԾ-ն, ինչը ենթադրում էր Իրանի նկատմամբ պատժամիջոցների վերացում՝ Թեհրանի կողմից միջուկային ծրագիրը սահմանափակելու դիմաց։
2018 թ. մայիսին ԱՄՆ-ի այն ժամանակվա նախագահ Դոնալդ Թրամփը դուրս եկավ ԳՀՀԾ-ից և միակողմանի կերպով վերականգնեց հակաիրանական պատժամիջոցները։
Ի պատասխան՝ Թեհրանը սկսեց փուլ առ փուլ կրճատել միջուկային ծրագիրը սահմանափակելու՝ համաձայնագրով նախատեսված իր պարտավորությունները։
ԱՄՆ գործող նախագահ Ջո Բայդենը հայտարարել է որոշակի պայմաններով միջուկային գործարքին վերադառնալու պատրաստակամության մասին։
