ՀՀ վարչապետ Նիկոլ Փաշինյանը կառավարության նիստի մեկնարկին անդրադարձել է Եվրոպական խորհրդարանի ընդունած «ԵՄ-ի և Հայաստանի միջև ավելի սերտ կապերի ու Ադրբեջանի և Հայաստանի միջև խաղաղության համաձայնագրի անհրաժեշտության մասին» բանաձևին։
«Բանաձևը 1991թ. Ալմա Աթայի հռչակագրի հիման վրա անսասան աջակցություն է արտահայտում Հայաստանի ինքնիշխանությանը, տարածքային ամբողջականությանն ու անկախությանը, նաև՝ Հայաստանի ու Ադրբեջանի միջև խաղաղության ջանքերին»,- ասել է վարչապետը․
Ըստ նրա, բանաձևում մեջբերված է նախորդ տարվա հոկտեմբերին ԵԽ ամբիոնից իր արած այն հայտարարությունը, թե ՀՀ-ն պատրաստ է այնքան մոտ լինել ԵՄ-ին, ինչքան ԵՄ-ն հնարավոր կհամարի.
«Արձանագրվել է, որ եթե ՀՀ-ն ցանկանա ԵՄ անդամության թեկնածու դառնալու հայտ ներկայացնել, ԵՄ ինստիտուտները պետք է աջակցեն»։
Փաշինյանը ողջունել է ԵԽ բանաձևը և հավելել.
«Կարծում եմ, որ այն ՀՀ-ում հանրային քննարկման առարկա պետք է դառնա։ Սա ևս մեկ առիթ է՝ քննարկելու ՀՀ ապագայի տեսլականը, և հույս ունեմ, որ ՀՀ քաղաքական ուժերը, հասարակական կազմակերպությունները, հանրության տարբեր շերտեր, քաղաքացիներ վերաբերմունք կարտահայտեն ԵԽ-ից հնչող այս ուղերձի վերաբերյալ, որովհետև նման ուղերձներն ունեն շատ ավելի լայն արձագանքի կարիք, քան կառավարության կամ խորհրդարանական մեծամասնության»։
Նա նաև շեշտել է. «Պետք է արտահայտեմ ՀՀ կառավարության կամքը՝ շարունակել աշխատանքները ՀՀ-ԵՄ հարաբերությունների հետագա խորացման և զարգացման ուղղությամբ»։
