ԱՄՆ նախկին նախագահ Դոնալդ Թրամփը նախազգուշացրել է, որ եթե ինքը պարտվի 2024 թվականի ընտրություններում, երկրում «արյունահեղություն կլինի», գրել է cnn.com-ը:
Հանրապետականը, մասնավորապես, նկատի է ունեցել ԱՄՆ-ի ավտոարդյունաբերության ոլորտը:
Թրամփը դրա մասին ասել է այն ժամանակ, երբ խոստացել է «100% մաքսատուրք» սահմանել ԱՄՆ-ից դուրս արտադրված մեքենաների համար՝ պնդելով, որ ներքին ավտոարտադրությունը պաշտպանված կլինի միայն այն դեպքում, եթե ինքն ընտրվի:
«Մենք պատրաստվում ենք 100% մաքսատուրք սահմանել յուրաքանչյուր մեքենայի վրա, որն անցնում է գիծը… Եթե ես չընտրվեմ, առնվազն արյունահեղություն կլինի երկրում », – ասել է Թրամփը:
Նախագահ Ջո Բայդենի նախընտրական շտաբն արձագանքել է սրան՝ հայտարարելով, որ նախկին նախագահը «ուզում է ևս մեկ հունվարի 6» կազմակերպել։
Հիշեցնենք, որ 2021-ի հունվարի 6-ին Թրամփի աջակիցները գրոհել էին Կապիտոլիումը:
«Ահա թե ով է Դոնալդ Թրամփը. պարտվող, որը կրկնապատկում է քաղաքական բռնության իր սպառնալիքները», – հայտարարել է Բայդենի նախընտրական արշավի խոսնակ Ջեյմս Սինգերը:
