ՀՀ առողջապահության նախարար Անահիտ Ավանեսյանն, ի պատասխան ԱԺ պատգամավորի հարցի, խորհրդարանում անդրադարձել է Վայոց Ձորի նորաբաց բժշկական կենտրոնի գործունեությանը։ Ավանեսյանի խոսքով, այդ բուժկենտրոնն իր վրա է վերցնելու մարզի հիվանդանոցային օղակի սպասարկումը. «Սա նշանակում է, որ Եղեգնաձորի բժշկական կենտրոնի պոլիկլինիկական հատվածը կմնա այնտեղ, Վայքի պոլիկլինիկական հատվածը կմնա, և հիվանդանոցային ծառայությունները կկենտրոնանան Վայոց ձորի միասնական ամբողջական բժշկական կենտրոնի շրջանակներում»։
Ըստ Ավանեսյանի՝ նորաբաց կենտրոնը սկսել է իր գործունեությունը. «Կա ծնված երեխա, իրականացվում են վիրահատություններ, և ուրախ ենք, որ թե պացիենտներն են գոհ, թե բուժաշխատողներն են ուրախ, որ աշխատում են նման պայմաններում»։
