Արդարադատության նախարարությունը շուտով կգործարկի սնանկության և հաշտարարության գործերով դատավարության էլեկտրոնային համակարգերը։
Ազգային ժողովի պետական-իրավական հարցերի մշտական հանձնաժողովի նիստին այս մասին ասաց Արդարադատության նախարար Գրիգոր Մինասյանը՝ ներկայացնելով Հայաստանի Հանրապետության կառավարության ծրագրի (2021-2026 թթ.) 2023 թվականի կատարման ընթացքի եւ արդյունքների մասին զեկույցը։
«Մշակվել են և շուտով կգործարկվեն սնանկության և հաշտարարության էլեկտրոնային համակարգերը։ Մրցույթները կայացել են, հաղթողները ունենք, համակարգերը պիլոտային փուլում են գտնվում»,- ասաց Մինասյանը։
Նախարարը նշեց, որ կատարելագործվել է դատական գործերի էլեկտրոնային մակագրության համակարգը, և արդյունքում մակագրության ժամանակ հիմք է ընդունվում նաև գործերի բարդությունը։
Մինասյանը խոսեց նաև քաղաքացիական գործերով դատավարության էլեկտրոնային համակարգի մասին՝ նշելով, որ համակարգում արդեն մոտ 850 հայցադիմում մակագրվել է, և այդ ամբողջը էլեկտրոնային է՝ նյութերը, կրիչները։«Երեք թեժ գծեր են գործել ողջ ընթացքում, և ի ուրախություն մեր գործընկերների՝շատ քիչ են եղել զանգերը։
Համակարգը ճիշտ կառավարելու շնորհիվ կարողացել ենք անցնել երկրորդ փուլ և գնալ նրան, որպեսզի տարվա վերջ նաև ֆիզիկական անձանց համար այս հարթակը լինի պարտադիր։ Դա կանենք, երբ նույնականացնող քարտերի հարցը երկրում լուծվի»,- եզրափակեց Մինասյանը։
