«Կրոկուս Սիթի Հոլում» տեղի ունեցած ահաբեկության ժամանակ բազմաթիվ մարդկանց կյանքը փրկած Կարեն Ենգիբարյանը մահացել է, տեղեկացրել է Ռուսաստանի հայերի միությունը։

35-ամյա Կարենը պատահական անցորդ էր։ Նա աշխատում էր արտաքին գովազդ տեղադրող ընկերությունում և ողբերգության պահին եղել է «Կրոկուսի» մոտակայքում։ Համերգասրահի տանիքին ծուխ է տեսել և վազել դեպի կենտրոնական մուտքը։ Մարդկանց դուրս էր հանում ծխից, տանում բժիշկների մոտ ու վերադառնում։ Տուժածներից մեկին տվել է իր վերնազգեստը։

Կարենը միայն առավոտյան է տուն վերադարձել։ Այդ ամենի հետևանքով նա չափազանց շատ շմոլ գազ է շնչել ու մրսել է. շտապօգնության ժամանման պահին ջերմաստիճանը եղել է 38,5:

Նրան հոսպիտալացրել են «շնչուղիների սուր վարակ» ախտորոշմամբ, վիճակը վատթարացել է հետագա օրերին։ Ցավոք, նրան փրկել չի հաջողվել։

Մարտի 30-ին հայկական եկեղեցական համալիրի Սուրբ Խաչ եկեղեցում վերջին հրաժեշտը կտան Կարեն Ենգիբարյանին: Նա ընդամենը 3 տարի առաջ էր ամուսնացել։