Գեղարքունիքի մարզի Սևան համայնքում արդեն մեկնարկել են ասֆալտապատ փողոցների փոսային նորոգումների աշխատանքները։
Ինչպես տեղեկանում ենք Սևանի համայնքապետարանի աշխատակազմից, գործընթացում ընդգրկված փողոցներում իրականացվող աշխատանքները ներառում են 2400 քմ նորոգում և 5000 գծամետր ճաքալցում:
«Սևան համայնքի ճանապարհների ասֆալտբետոնե ծածկույթի փոսային նորոգում» ծրագրի պայմանագրային արժեքը 16 մլն 710 հազար 960 դրամ է, որն ամբողջությամբ հատկացվելու է համայնքային բյուջեից։ Աշխատանքներն իրականացնում է «ՃԱՆ-ՇԻՆ» ՍՊԸ-ն։
Նորոգման աշխատանքները ներառելու են վնասված ծածկույթի քանդում, փողոցների ճաքերի բետոնապատում, 25 դիտահորի կափարիչների բարձրացում, փոսային նորոգում, անձրևաընդունիչների մաքրում։ Ընթացքում կվերանայվեն նորոգման ենթակա տարածքները:
«Կարևորելով ներհամայնքային ճանապարհների հիմնանորոգված և բարեկարգ տեսքը՝ այս տարի էլ Սևան համայնքում նախատեսված են և իրականացվելու են ճանապարհաշինական սուբվենցիոն ծրագրեր և՛ Սևան քաղաքում, և՛ համայնքի բնակավայրերում»,-հավաստեցին Սևանի համայնքապետարանի աշխատակազմից:
