«Քաղաքացիական պայմանագիր» խմբակցության ԱԺ պատգամավոր Խաչատուր Սուքիասյանը հարց է ուղղել Աշխատանքի և սոցիալական հարցերի նախարար Նարեկ Մկրտչյանին՝ կապված Լեռնային Ղարաբաղից բռնի տեղահանվածների խնդիրների հետ։
«ՀՀ-ում կան կիսավարտ շենք-շինություններ, որոնք խորհրդային տարիներին կոչվում էին այգեգործական ընկերություններ. մեծ գործարանները տալիս էին տարածքներ, իսկ մարդիկ կառուցում էին։ 30 տարի է սրանք կիսավարտ վիճակում են, կարող ենք դրանք հարմարեցնել ԼՂ-ից բռնի տեղահանված մեր հայրենակիցներին։ Կցանկանայի, որ կառավարությունը մարզպետարաններին, գյուղապետարաններին հանձնարարական տա այս հարցով»,- ասել է պատգամավորը։
Նա հավելել է, որ այդ շենքերը 30 տարի լքված վիճակում են․ «Մենք պետք է գեղեցկացնենք մեր երկիրը, ինչի՞ համար դա ևս 30-50 տարի մնա, պետք է տանք լավ պայմաններ, որ դա լուծվի»։
Սուքիասյանը շեշտել է նաև գյուղերի անձնագիր ունենալու կարևորությունը, որտեղ նշված կլինի, թե ինչ օգտակար հանածոներ ունի, մալուխներ, ինչ աշխատուժ ունի, որպեսզի բիզնեսն ուղղորդեն այդ տարածք:
