ՀՀ վարչապետ Նիկոլ Փաշինյանը կառավարության ծրագրի կատարողականի ելույթում հայտարարել է, թե կարևոր սկզբունքային հարցերի վերաբերյալ ընդդիմադիրների ելույթները լսելիս ինքն իրեն հարց է տալիս՝ իսկ ինչն են նրանք սխալ ասում, ինչու համաձայն չի նրանց ասածին․ «Այս համատեքստում, կարծում եմ, այս երկու օրերի քննարկումն առարկայացրեց բանավեճը պատմական Հայաստանի և իրական Հայաստանի հայեցակարգերի մեջ»։
Ըստ նրա, շատ դիպուկ հարց է հնչել, թե ինչպես կարող է լինել 7-րդ դարի եկեղեցուց մի քանի մետր այն կողմ լինել Ադրբեջան. «Սա շատ կարևոր հարց է․ իսկ ինչպե՞ս կարող է լինել 7-րդ դարի եկեղեցի, իսկ մի քանի մետր այն կողմ լինել Թուրքիա, որովհետև Խոր Վիրապը՝ քրիստոնեության մեր ակունքը, գտնվում է մի տեղ, որից մի քանի մետր այն կողմ Թուրքիան է։ Հայեցակարգային բանավեճն այստեղ է։ Մենք ընդունու՞մ ենք, որ Խոր Վիրապից մի քանի մետր այն կողմ Թուրքիան է, թե՞ ոչ։ Ես ասում եմ՝ կառավարությունն ու քաղաքական մեծամասնությունն ընդունում է, որ Խոր Վիրապից մի քանի մետր այն կողմ Թուրքիան է, և կառավարության համար այս արձանագրումն անվտանգության ապահովման կարևորագույն միջոց է։ Եւ ռազմավարական ընտրությունը սրա մեջ է»։ Ըստ նրա՝ նույն մոտեցումն է նաև Ոսկեպարի դեպքում։
Նա հարց է հնչեցրել, թե ինչն է պատճառը, որ ընդդիմության թվարկածներից հետո ինքը շարունակում է մնալ վարչապետ. «Որովհետև ես տիրապետում եմ մեր ազգային արժեքներից ամենակարևորներից մեկի՝ հայոց լեզվի ոչ միայն տառին, այլև ոգուն, հոգուն, էմոցիային, որով զգում եմ ժողովրդի զգացումներն ու հույզերը։ Եւ պետք չէ այդ էմոցիաների վրա խաղալ»։
