Գյումրին տարածաշրջանում երկրորդ քաղաքն է, որտեղ հոգեկան առողջության թերապիաները անցկացվելու են գերժամանակակից լիցենզավորված վիրտուալ իրականության (VR) մեթոդով։ «Արմենպրես»-ը տեղեկացրել է, որ նախաձեռնությունը Ֆրանսիական «Լույս» ասոցիացիայի հովանու ներքո գործող «Հայ-ֆրանսիական հոգեբանական և սոցիալական աջակցման» կենտրոնինն է: Նախաձեռնությունն իրականացվում է «Հերոսների վերականգնողական քաղաք» հոգեկան առողջության կենտրոնի հետ համատեղ:
Սրան զուգահեռ, մասնագետների խնդիրը լուծելու նպատակով անցկացվում է VR թերապիայի սեմինար, որի շրջանակում մասնակից հոգեբանները հնարավորություն ունեն ծանոթանալու գերժամանակակից սարքին, կիրառման և բուժման մեթոդներին։
«Մենք շատ աչալուրջ ենք այս հարցի շուրջ, քանի որ մասնագետների պրոֆեսիոնալ լինելը շատ կարևոր է. ոչ պրոֆեսիոնալ մեթոդի կիրառման դեպքում այն կարող է վնաս հասցնել: Դրա համար էլ մենք շեշտը դնում ենք մասնագետների վերապատրաստման վրա»,-«Արմենպրես»-ին ասել է «Ֆրանսիական Լույս» ասոցիացիայի հիմնադիր և նախագահ Լևոն Խաչատրյանը:
«Այս կենտրոնի մասնագետներն անցկացնում են գյումրեցի մասնագետների ինտենսիվ վերապատրաստում: Սարքավորումներն արդեն Գյումրիում են»,- հայտնել է Լևոն Խաչատրյանը՝ տեղեկացնելով, որ բուժումն իրականացվում է անվճար. մինչ այդ նպատակ կար բուժումն իրականացնել միայն Լեռնային Ղարաբաղից տեղահանվածների համար, սակայն այս չափորոշիչն ավելացավ նաև պատերազմի հետևանքով հաշմանդամություն ստացած զինվորների և նրանց ընտանիքի անդամների, ինչպես նաև սոցիալապես ծայրահեղ անապահով անձանց համար։
