ԱՄՆ նախագահ Ջո Բայդենը, որի հասցեին տարբեր շրջանակներից կոչեր են հնչում նախագահական մրցապայքարից դուրս գալու վերաբերյալ, ասել է, որ իր մտքի սրությունը «բավականին լավն է»:
81-ամյա նախագահն այս մասին ասել է NBC Nightly News-ի հաղորդավար Լեսթեր Հոլթին տված հարցազրույցում: Հոլթը հարցրել է Բայդենին, թե ում է նա լսում «խորապես անձնական հարցերի» վերաբերյալ, ինչպիսիք են մրցավազքում մնալ-չմնալու որոշումները:
«Ինձ: Ես վաղուց եմ դա անում», – ասել է Բայդենը:
Այնուհետև նա անդրադարձել է իր տարիքի շուրջ քննարկումներին՝ ընդգծելով, որ ընտրություններում իր մրցակից Դոնալդ Թրամփից մեծ է ընդամենը 3 տարով:
«Ես ծեր եմ, բայց Թրամփից ընդամենը 3 տարով եմ մեծ: Բացի այդ, իմ մտքի սրությունը բավականին լավն է», – ընդգծել է նա:
Բայդենը նաև պնդել է, որ ինքն ավելին է արել, քան որևէ նախագահ «երկար, երկար ժամանակ»:
