Չնայած հոկտեմբերի 23-ի ուշ երեկոյան թուրքական մի քանի լրատվամիջոցներ տեղեկություն էին տարածել, որ նախագահ Էրդողանն «ընդհատում է Կազան այցը եւ շտապ հայրենիք է վերադառնում», հաջորդ օրը թուրքական պատվիրակությունն ամբողջ կազմով մասնակցել է բոլոր նախատեսված միջոցառումներին:
Ներքին գործերի նախարար Երլիքայան սոցիալական X հարթակում գրառում է կատարել, որ TAI ընկերության տարածք երկու «ահաբեկիչ է ներխուժել»՝ տղամարդ եւ կին, որ «տեղում ոչնչացվել են»: Նա ասել է, որ տղամարդու ինքնությունը ճշտված է՝ Ալի Օրեկ: Նա «Քրդական բանվորական կուսակցության ահաբեկչական խմբավորման անդամ է»:
Ավելի ուշ ՆԳՆ-ն հայտնել է, որ պարզվել է նաեւ «կին ահաբեկչի ինքնությունը»: Նա Մինե Սեւինջ Ալչիչեքն է, նույնպես ՔԲԿ «ահաբեկչական խմբավորման անդամ»: Ի՞նչ նպատակ են հետապնդել «քուրդ ահաբեկիչները»՝ որեւէ վարկած դեռեւս չի շրջանառվել:
Ըստ երեւույթին, Թուրքիայի իրավապահ մարմիններն այդ գործով հետաքննություն չեն անցկացնի: Հանրությանը ներկայացված է պաշտոնապես ձեւակերպված գնահատական. «Քուրդ ահաբեկիչները փորձել են խաթարել Թուրքիայի միասնությունը եւ անվտանգությունը, ստոր դավաճանները ոչնչացված են, ամեն ինչ կարվի, որպեսզի «ահաբեկչության զոհերի» արյան վրեժն առնվի»:
Թուրքական մամուլը հայտնում է, որ Ազգային հետախուզության ծառայությունը «ՔԲԿ ռազմական հենակետերին հուժկու հարվածներ է հասցնում Իրաքի եւ Սիրիայի հյուսիսում, գործի են դրվել հետախուզական եւ հարվածային ԱԹՍ-ներ»:
Փաստացի Անկարայի «քրդական ահաբեկչությունը» Թուրքիայի իշխանությունների ձեռքերն ազատել է, որպեսզի սկսի «քուրդ ահաբեկիչների դեմ հատուկ ռազմագործողությունը»: Այդ մասին Էրդողանը խոսել է դեռեւս գարնանը:
Գազայում, իսկ հոկտեմբերի սկզբից նաեւ Լիբանանի հարավում ընթացող պատերազմին Թուրքիայի ուղղակի միջամտության առիթ չկա, կամ այդ փորձերը լուրջ դիմադրության են հանդիպում միջազգային դերակատարների եւ տարածաշրջանի ազդեցիկ երկրների կողմից:
Անկարայի «ահաբեկչությամբ» ստեղծվել է իրավիճակ, երբ ոչ մի երկիր Թուրքիային չի կարող անգամ կշտամբել, թե ինչու է թիրախավորում Իրաքի եւ Սիրիայի հյուսիսը: Պատասխանն Էրդողանի «գրպանում է» եւ հնչում է այսպես. «Դուք Թուրքիային ահաբեկչական պատերա՞զմ եք հայտարարել»:
Թուրքական մամուլն իր հերթին, կարծես, հրահանգավորված է տեղեկատվա-քարոզչական այնպիսի ֆոն ստեղծել, ասես «քուրդ ահաբեկիչներն ամենուր են եւ ամեն վայրկյան սպառնում են խաղաղ մարդկանց»:
Տեղեկություն է տարածվել, որ սոցիալական ապահովության եւ ընտանիքի հարցերով նախարար Մահինուր Գյոկթաշը մասնակցել է նախօրեին «ահաբեկիչների կողմից սպանված» տաքսի մեքենայի վարորդ Մուրատ Արսլանի թաղման արարողությանը եւ երբ պետք է այցելեր հիվանդանոց՝ տեսակցելու վիրավորներին, նրա «մեքենան վթարի է ենթարկվել»:
Նախարարուհին չի տուժել, ուղեկցող անձինք «մարմնական թեթեւ վնասվածքներ են ստացել»: Բայց տեղեկատվական ընդհանուր ֆոնն ապահովվել է. Թուրքիայում «ահաբեկիչներ են»: Ամենայն հավանականությամբ, Էրդողանը ներիշխանական հերթական «մաքրագործման» է նախապատրաստվում:
04:21
Հուլիս 21, 2026
