Ոչ ոք չի հերքում Ցեղասպանությունը. պետք է վերլուծել` թույլ չտալու համար կրկնություն

«Ի տարբերություն Լուկաշենկոյի՝ մենք ոչ մեկի հետ սիրախաղ չենք անում։ Մենք վարում եք արտաքին քաղաքականություն բոլոր ուղղություններով»: Այս մասին ասաց Ազգային ժողովի «Քաղաքացիական պայմանագիր» խմբակցության պատգամավոր Արսեն Թորոսյանը՝ անդրադառնալով Բելառուսի նախագահ Լուկաշենկոյի հայտարարություններին, թե Ն. Փաշինյանը սիրախաղ է սկսել ԵՄ-ի հետ, ու դա կործանելու է Հայաստանը։

Ըստ Թորոսյանի՝ Բելառուսում ու ՌԴ-ում կարծում են, թե ՀՀ-ն չպետք է ինքնուրույն արտաքին քաղաքականություն վարի. «Իրենց զարմանքը դրանում է, թե ոնց կարող է ինչ-որ մեկը առանց ՌԴ-ի որոշում կայացնել»։

Պատգամավորը նշեց, որ վարչապետը չի հերքել Հայոց ցեղասպանությունը. «Վարչապետը ասում է, որ պետք է վերլուծենք, թե ինչու տեղի ունեցավ ցեղասպանությունը, որպեսզի թույլ չտանք դրա կրկնություն։ Ու վարչապետը ասում է՝ արդյոք կարելի՞ է ենթադրել, որ Սովետական Միության մեջ 10 տարվա ընթացքում բան է փոխվել այդ օրակարգը թույլ տալու կամ չտալու տեսանկյունից, ինչո՞ւ 1939թ.-ին ոչ մեկը չէր խոսում Ցեղասպանության մասին, բայց 1950-ականներից դա հնարավոր եղավ։ Արդյո՞ք դա կենտրոնական քաղաքականության փոփոխություն չէր նշանակում մեր գաղափարախոսությունը վերաձևակերպելու իմաստով, թե արդյո՞ք Հայաստանի ժողովրդին պետք չի օգտագործել, այդ ողբերգությունը օգտագործելով՝ պահել ինչ-որ գաղափարական իմաստով»։