Երևան համայնքի վարչական սահմաններից դուրս՝ մի քանի մետր այն կողմ, Հրազդանի կիրճի՝ դեպի Զովունի գնացող հատվածում բնապահպանական աղետ է հասունանում։ Մեկ այլ վայրից՝ հավանաբար շինարարության տարածքից հիմքերից փորված լիցքերը՝ քարի և ընդերքից հանված զանգվածի տեսքով բերվում և թափվում են այստեղ։ Բերված շինարարական զանգվածը այնքան է կուտակվել կիրճի տարածքում, որ նույնիսկ հասնում է Հրազդան գետին և տեղ-տեղ գրեթե փակում է հունը։
Սա բնապահպանական աղետի պատճառ կարող է դառնալ՝ մեծ վնաս հասցնելով շրջակա միջավայրին և հարակից շրջաններին։ Հատկանշական է, որ Հրազդանի կիրճը ոչ միայն բնապահպանական, այլև զբոսաշրջային նշանակություն ունի։ Կիրճն աղբավայրի վերածվելով՝ ոչ միայն կորցնում է հանրային գրավչությունը, այլև ինքնին դառնում բնապահպանական խնդիրների պատճառ։
Radar Armenia-ն դիմեց պատկան մարմիններին՝ հասկանալու խնդիրն ու դրա լուծումները։ Գրավոր և բանավոր հարցումներ են իրականացվել Բնապահպանության և ընդերքի տեսչությանը, ՀՀ Տարածքային կառավարման և ենթակառուցվածքների և Շրջակա միջավայրի նախարարություններին։
Ըստ դեռևս ճշտման ենթակա տեղեկատվության՝ փաստացի շինարարական աղբավայրի վերածված այդ հատվածը մասնավոր սեփականություն է, և առաջին անգամը չէ, որ այդտեղ շինաղբի կուտակումներ են հայտնվում։ Նախկինում ևս նման դեպք է արձանագրվել, և զգուշացումներից հետո հեռացվել է։ Այս անգամ, սակայն, Հրազդան գետի հունը փակման վտանգի է հասել։
