Նվազագույն կենսաթոշակը 1 շնչի հաշվով գերազանցում է պարենային զամբյուղի արժեքը. Տիգրանյան

«Հայաստան» խմբակցությունը նախաձեռնել է օրենքի նախագիծ, համաձայն որի՝ առաջարկում է 2026 թվականի հունվարի 1-ից նվազագույն կենսաթոշակի չափը սահմանել այնպես, որ այն պակաս չլինի պարենային զամբյուղի ամսական արժեքից, իսկ միջին աշխատանքային կենսաթոշակի չափը պակաս չլինի սպառողական զամբյուղի ամսական արժեքից: Այդ մասին Ազգային ժողովի՝ մարտի 25-ի նիստին ասաց «Հայաստան» խմբակցության պատգամավոր Արծվիկ Մինասյանը:

«Առաջարկվում է նաև, որ սպառողական զամբյուղի էներգետիկ արժեքը, նրանում ներառվող սննդաթերքի կազմը, կառուցվածքը սահմանելու իրավասությունը վերապահվի ՀՀ կառավարությանը: Ընդ որում՝ որպես հաշվարկի հիմք, առաջարկվում է օրենքում կատարել փոփոխություն, ըստ որի՝ հիմքում պետք է դրվեն նախորդ տարվա 3-րդ եռամսյակի միջին ընթացիկ գներով հաշվարկված պարենային և սպառողական զամբյուղի արժեքները»,- ասաց Արծվիկ Մինասյանը:

Հարակից զեկուցող, «Քաղաքացիական պայմանագիր» խմբակցության պատգամավոր Հերիքնազ Տիգրանյանը տեղեկացրեց, որ նախագիծը քննարկվել է հանձնաժողովում և բացասական եզրակացություն ստացել այն հիմնավորմամբ, որ «Պետական կենսաթոշակների մասին» օրենքում արդեն իսկ կա սկզբունք, որով ամրագրվում է, որ սոցիալական, կենսաթոշակային ապահովության ոլորտում պետության հիմնական սկզբունքն է կենսաապահովման նվազագույն բյուջեի չափի հետ համադրելի պետական կենսաթոշակի նվազագույն չափն ապահովելը:

«Հետևաբար կրկնաբանություն անել և անցումային դրույթներում ավելացնել մի կետ, որ 2026-ի հունվարից հետո նվազագույն և միջին թոշակը պիտի համապատասխանեն պարենային և սպառողական զամբյուղին, ըստ էության, այն է, ինչ մեր հանձնառությունն է, և մենք դա իրականացնում ենք: Ասեմ ավելին՝ օրենքում ամրագրելու անհրաժեշտություն չկա, որովհետև ընտրանքային, իշխող քաղաքական թիմից վերցնել սոցիալական բլոկի մեկ հանձնառություն և դրան տալ օրենքի ուժ, կարծում եմ՝ արդար չէ նաև մեր մյուս հանձնառությունների նկատմամբ»,- ասաց Հերիքնազ Տիգրանյանը:

Իշխող թիմի պատգամավորը նաև նկատեց՝ անկախ այն հանգամանքից, թե վերջինս օրենք կդառնա՞, թե՞ չէ, այն արդեն քաղաքական թիմի հանձնառությունն է, որն իշխող թիմը ստանձնել է 2021 թվականին, հաստատել Կառավարության ծրագրով:

«Մենք մեզ համար դրել ենք հիմնական վերջնանպատակ, որ նվազագույն կենսաթոշակը և միջին աշխատանքային կենսաթոշակը համապատասխանաբար հավասարեցնենք պարենային զամբյուղին և սպառողական զամբյուղին, ավելին՝ հավասարեցնենեք նաև պարենային ու սպառողական զամբյուղների արժեքը»,- ասաց նա:

Տիգրանյանը նաև հավելեց՝ անցած 4 տարիներին Կառավարությունը հետևողական է եղել իր ստանձնած հանձնառության մեջ, և մոտ 22 տոկոսով ավելացել են կենսաթոշակի չափերը: «Այս պահին մեր նվազագույն կենսաթոշակը 1 շնչի հաշվով գերազանցում է պարենային զամբյուղի արժեքը»,- նշեց նա:

Գործում է նաև հետվճարի համակարգը, որի շնորհիվ կենսաթոշակի բարձրացման հնարավորություն կա, ուստի ընդդիմության նախագիծը ոչինչ չի տալիս և ոչինչ չի ավելացնում: