Չինաստանը պատրաստվում է լայնամասշտաբ պատերազմի. Պենտագոն

Չինաստանը պատրաստվում է պատերազմի և նախատեսում է մինչև 2030 թվականը իր միջուկային զինանոցը հասցնել ավելի քան 1000 մարտագլխիկի։ Այս մասին նշվում է ԱՄՆ պաշտպանության նախարարության վերջին զեկույցում, տվյալները ներկայացնում է Clash Report-ը։ Պենտագոնի գնահատմամբ՝ ներկայումս Չինաստանի Ժողովրդական Հանրապետությունը ունի մոտ 600 միջուկային մարտագլխիկ։

Զեկույցում ընդգծվում է, որ Պեկինը կենտրոնացած է ոչ միայն միջուկային պաշարների քանակական աճի, այլև դրանց կիրառման համակարգերի արդիականացման վրա։ Խոսքը վերաբերում է բալիստիկ հրթիռների, ստորգետնյա հրթիռային հանքերի, ինչպես նաև վերահսկման և հետախուզական համակարգերի զարգացմանը։

Ամերիկյան պաշտպանական գերատեսչության գնահատականով՝ այս քայլերը միտված են Չինաստանի ռազմական հնարավորությունների ընդլայնմանը և ռազմավարական դիրքերի ամրապնդմանը միջազգային մակարդակում։ Զեկույցում նշվում է, որ Վաշինգտոնը դիտարկում է այս գործընթացը որպես Պեկինի պատրաստակամություն հնարավոր լայնամասշտաբ հակամարտությունների պայմաններում գործելու համար։

Միաժամանակ փաստաթղթում չի նշվում, թե Չինաստանը երբ կամ ինչ պայմաններում կարող է կիրառել իր միջուկային ներուժը՝ շեշտելով, որ ներկայացված տվյալները հիմնված են վերլուծական գնահատականների վրա։