Ես կոչ եմ անnւմ, որ hեղափnխnւթյnւն անեն. Փաշինյան

«Ես կայացված մի շարք որոշումների վերաբերյալ իմ հրապարակայն գոհունակությունն արտահայտել եմ»,- կառավարության նիստից հետո տեղի ունեցած ճեպազրույցում ասաց Նիկոլ Փաշինյանը՝ պատասխանելով հարցին, թե ինչպես նախագահ Վահագն Խաչատուրյանը, ինքն է՞լ շնորհակալ, երախտապարտ է Ադրբեջանի նախագահ Իլհամ Ալիևին։

Նա շարունակեց. «Մասնավորապես, եթե Ադրբեջանի տարածքով Հայաստան գալիս է հացահատիկ, դիզվառելիք, ճանապարհների ապաշրջափակում է տեղի ունենում, ես չեմ կարծում, որ դրա համար մենք պետք է Ադրբեջանին կամ քննադատենք, էլ չեմ ասում, որ դատափետենք»։

Ադրբեջանի կողմից Հայաստանի օկուպացված տարածքներին մասին հարցին ի պատասխան՝ Փաշինյանն ասաց. «Ես իմ ուղերձներում էլ դրա մասին հստակ դիրքորոշում արտահայտել եմ՝ ասելով, որ Հայաստանի օկուպացված տարածքների հարցը կլուծվի դելիմիտացիայի պրոցեսի շրջանակներում, և համոզված եմ, որ կլուծվի»:

Փաշինյանը նաև նշեց, որ այն խոսույթը՝ «Ղարաբաղը մերն էր, այլևս մերը չէ», այդ աշխարհաքաղաքական թակարդում գտնվողի խոսույթ է:

«Ճշմարտությունն այն է, որ Հայաստանը մերը չէր, և այլևս մերն է: Կարծում եմ՝ մեկընդմիշտ պետք է փակենք այդ թեման, որովհետև Հայաստանը և Ադրբեջանը պայմանավորվել են Ալմա Աթայի հռչակագրի հիման վրա ճանաչել միմյանց տարածքային ամբողջականությունը և ինքնիշխանությունը, քաղաքական անկախությունը, և այդ թեման ինձ համար փակված է:

Ես էլ Հայաստանի ժողովրդին շատ ուղիղ հրապարակային ասել եմ, որ կարծում եմ՝ Ղարաբաղի շարժումը պետք է չշարունակվի: Ես, որպես Հայաստանի վարչապետ, որդեգրում եմ այդ գիծը և տանելու եմ այդ գիծը, և եթե քաղաքացիները գտնում են, որ սխալ եմ ես, անհամաձայնություն ունեն այդ քաղաքականության հետ, ես կոչ եմ անում, որ նրանք հեղափոխություն անեն: Ես կարծում եմ՝ շատ վարչապետ չի եղել որևէ երկրում, որ ժողովրդին կոչ անի հեղափոխություն անել: Ժողովուրդը հեղափոխություն չի արել, և մենք այդ քաղաքականությունը շարունակում ենք»,- ասաց Փաշինյանը: