«Իմ քայլը» խմբակցության պատգամավոր Արթուր Հովհաննիսյանը ֆեյսբուքյան իր էջում գրել է.
ԼՀԿ-ի գործողությունները որոշ դրվագներում նույնանում են ՀՀԿ-ի գործողությունների հետ
«Լուսավոր Հայաստան» խմբակցության ղեկավար Էդմոն Մարուքյանն այսօր ԱԺ ամբիոնից բացարձակ սուտ և զրպարտիչ խոսքեր հնչեցրեց «Իմ քայլը» խմբակցության ու մեր ողջ քաղաքական թիմի հասցեին։
Մարուքյանը մեզ մեղադրեց ատելության խոսք տարածելու, ատելության խոսքը չդատապարտելու, ֆեյքեր պահելու, մեդիաներ ունենալու և, առիթը բաց չթողնելով, նաև Էջմիածնում «ոչ»-ի թաղումը մեր կողմից կազմակերպված լինելու մեջ։
Կանեմ երկու արձանագրում․
1․ «Իմ քայլը» խմբակցությունը և կառավարող քաղաքական ուժը մշտապես դատապարտել է ատելության խոսքի և բռնության ցանկացած դրսևորում։ Դրա գործնական ապացույցն է «Բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը քրեականացնելու մասին» ՀՀ կառավարության կողմից ներկայացված նախագիծը, ԱԺ-ում «Իմ քայլը» խմբակցության կողմից ստեղծված «Ատելության խոսքի դեմ պայքարի» աշխատանքային խմբի ստեղծումը, հայտարարության տեսքով ատելության խոսքի դատապարտումը և մի շարք հրապարակային ելույթներ, հարցազրույցներ, գրառումներ, մեկնաբանություններ․․․
Սա փաստում է Մարուքյանի կողմից հնչեցված արտահայտությունների բացարձակ սուտ լինելու մասին։
2․ Մինչ այս պահը կառավարող քաղաքաքական ուժին մեդիաներ պահելու, ֆեյքեր աճեցնելու, համացանցում ատելության խոսք տարածելու մեջ մեղադրում էին բացառապես նախկին իշխանության ներկայացուցիչները հեղափոխությանը խոչընդոտելու ու մեր քաղաքացիներին ապակողմնորոշելու համար։
ԼՀԿ-ն նույն բանն անում է ԱԺ ամբիոնից, խմբակցության ղեկավարի մակարդակով։
Սա առնվազն ինձ թույլ է տալիս որոշ դրվագներում (և դրանք գնալով շատանում են) ԼՀԿ-ի գործողություններն ու նպատակները նույնացնել ՀՀԿ-ի գործողությունների ու նպատակների հետ։
Ինձ համար ընդդիմությունն առաջին հերթին հաջորդ իշխանությունն է։
Ցավոք, դեռ ժամանակ է պետք։
Հ․Գ․ Իսկ մինչ այդ, մենք ամենայն անկեղծությամբ ու նվիրումով կերտում ենք մեր երազանքների Հայաստանը։
