Ամեն ինչ լավ է լինելու՝ լիահույս է Նաիրա Զոհրաբյանը

Նաիրա Զոհրաբյանը կրկին պնդում է՝ այս ամենը սկսվել է Գագիկ Ծառուկյանի հայտնի ելույթից հետո, իսկ լրագրողի նկատառմանը, որ Դատախազ Արթուր Դավթյանի միջնորդության մեջ նշված է ամիսներ առաջ հավաքված նյութերի մասին, պատգամավորը հայտարարեց․«Արթուր Դավթյանն իր միջնորդության մեջ ինչ ասես կարող էր նշել։ Կարող էր նշել, որ նյութերը նախապատրաստվել են, ասենք, խորը միջնադարում կամ մեր թվարկությունից առաջ 6-րդ դարում»։

Զոհրաբյանը վստահ պնդում է՝ որևէ ցուցմունք, որ Գագիկ Ծառուկյանը Վազգեն Պողոսյանին, կամ իքսին, կամ իգրեկին գումար տվել է ընտրական կաշառք բաժանելու համար, չկա և չի կարող լինել այն պարզ պատճառով, որ նման բան չի եղել։

Պատգամավորն արձանագրեց, որ խուզարկություններ են կատարվել կուսակցության անդամների և նրանց հետ փոխկապակցված բոլոր անձանց և մերձավորների ընտանիքներում, առգրավվել են «ինչ կա-չկա»՝ համակարգիչներ, հեռախոսներ, նաև խուզարկել են «Բարգավաճ Հայաստան» կուսակցության գլխավոր գրասենյակի իր աշխատասենյակը, որտեղ վերջին անգամ պատգամավորը եղել է 3 կամ 4 տարի առաջ՝ փնտրելով հիմնավորում իր և ընտրական կեղծարարության միջև։

Այդուամենայնիվ՝ Նաիրա Զոհրաբյանը լիահույս է, որ այս ժամանակները անցնելու են, և ամեն ինչ լավ է լինելու։ Նա ակնկալում է, որ Դատարանը չի կատարի քաղաքական պատվեր և վճիռ կայացնող դատավորը հավատարիմ կմնա բացառապես ՀՀ Քրեական օրենսգրքին և արդարադատությանը։

Քրիստինե Հովսեփյան