Լրագրող Հակոբ Ռուբինյանը ֆեյսբուքյան իր էջում գրել է.
Բոլորին
Դիմում եմ իմ բոլոր ընկերներին և «չընկերներին», ինձ հետևողներին, ծանոթներին և անծանոթներին, համախոհներին և հակառակորդներին…
Դիմում եմ խնդրանքով, եթե կուզեք՝ աղերսով:
Անկախ ձեր տեսակետներից, քաղաքական հայացքներից, զբաղեցրած դիրքից և պաշտոնից (ներկա կամ նախկին), տարիքից և սեռից, քաղաքական, կրոնական կամ սեռական պատկանելությունից, խնդրում եմ պարկեշտություն և փոխադարձ հարգանք: Հասկանում եմ, որ այս կոչին կմիանան կամ կանսան հատուկենտ անձինք, բայց միևնույն է՝ խնդրում եմ:
Երբեմն ուղղակի սարսափ են առաջացնում հայհոյանքի, լուտանքի, անձնական վիրավորանքների քանակն ու դրսևորման ձևերը: Առավել սարսափելի է, երբ դա անում են մտավորականները:
Ամենասուր և ոչնչացնող քննադատության դեպքում անգամ երբեք ինձ թույլ չեմ տվել իջնել այդ մակարդակին:
Սոցիալական ցանցերը վերածվել են հասարակական կոյուղու:
Բավական է…
Ես ունեմ անձնական ընկերներ երևի թե բոլոր ճամբարներում, սակայն իմ և նրանցից ոմանց անգամ բևեռային հայացքները ինձ որևէ մեկից չեն զրկել:
Այսօր իմ ընկեր Ռաֆայել Հովհաննիսյանը դուրս եկավ Ֆեյսբուքից, պատճառաբանելով, որ այն իրեն դարձնում է վատը:
Մտավորականներ, ձե՛զ եմ դիմում, ուշքի՛ եկեք: Ես հարգում եմ յուրաքանչյուրի հայացքները, անկախ նրանից համամիտ եմ, թե՝ոչ:
Արտահայտվեք, քննադատեք, ծաղրեք, սակայն մի իջեք գարշահոտության մակարդակի:
Լրագրողներ և «լրագրող» կոչեցյալներ, ձեզանից շատ բան է կախված:
Ինձ համար սա շատ ավելի լուրջ խնդիր է, քան Սահմանադրական դատարանի, մեղադրյալ Քոչարյանի, գույքահարկի կամ ցանկացած այլ հարց:
Սկունսին բնությունն օժտել է յուրատեսակ պաշտպանական զենքով. այն սարսափելի տհաճ հոտ է արձակում…
Մեկ անգամ էլ խնդրում եմ հիշել, որ մենք ոչ թե սկունս ենք, այլ «բանական մարդ»…
Հ.Գ. սոցցանցերում հայհոյախոսող հայ կնոջից գարշելի բան երևի չկա…
