Զորավարժությունների նպատակն է ահաբեկե՞լ Հայաստանին

Թուրք-ադրբեջանական ցամաքային և օդային ուժերի մասնակցությամբ համատեղ զորավարժություններին անդրադառնալով՝ թուրքական լրատվամիջոցները գրել են, որ այն կապված է հայ-ադրբեջանական սահմանին տեղի ունեցած վերջին մարտերի հետ և  դրանց նպատակն է ահաբեկել Հայաստանին՝ փոխանցում է ermenihaber-ը։

Դաշնակից երկրների միացյալ ուժերով զորավարժությունները կանցկացվեն Նախիջևանում, որտեղ արդեն տեղի է ունեցել Ադրբեջանի և Թուրքիայի պետական դրոշների փոխանակման արարողությունը։ Զորավարժություններին կմասնակցեն երկրների ռազմական ավիացիան և հակաօդային պաշտպանության միջոցները։

Ըստ պլանի՝ զորավարժությունները ցամաքային զորքերի ներգրավմամբ օգոստոսի 1-5-ը կանցկացվեն Բաքվում և Նախիջևանում, հուլիսի 29-ից օգոստոսի 10-ը՝ Բաքվում, Նախիջևանում, Գյանջայում, Քյուրդամիրում և Եվլախում՝ ռազմական ավիացիայի ներգրավմամբ։

Հիշեցնենք, որ Ադրբեջանի Պաշտպանության նախարարության՝ համատեղ զորավարժություններ անցկացնելու մասին հայտարարությանը հաջորդեց ՌԴ նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի հեռախոսազրույցը, որի ընթացքում առաջնորդները քննարկել են հայ-ադրբեջանական սահմանի լարվածության ֆոնին ստեղծված իրավիճակն Անդրկովկասում։ Կողմերը պատրաստակամություն են հայտնել ջանքեր գործադրել և լարվածությունը մեղմել բացառապես խաղաղ բանակցությունների միջոցով։