Կառավարության այսօրվա արտահերթ նիստում որոշում կայացվեց արտակարգ դրության ռեժիմը ևս մեկ ամսով երկարաձգելու վերաբերյալ։ Միևնույն ժամանակ հայտարարվեց արտակարգ դրության ռեժիմի մի քանի էական մեղմացումների մասին՝ հավաքների ու գործադուլների արգելքի վերացում, մինչև 40 հոգու մասնակցությամբ միջոցառումների անցկացման թույլտվություն և ամենակարևորը՝ ՀՀ քաղաքացի չհանդիսացող օտարերկրացիների մուտքի թույլտվություն՝ ինքնամեկուսացման պահանջի պահպանմամբ։
Այսպիսով, թեև ֆորմալ առումով արտակարգ դրության ռեժիմը երկարաձգվում է, սակայն բովանդակային տեսանկյունից այն գործնականում դադարելու է՝ պահպանվելու են քիչ թվով աննշան սահմանափակումներ։ Իսկ դա նշանակում է ռիսկի շատ, չափազանց էական մեծացում։ Հատկապես օդային հաղորդակցության վերսկսումը ու օտարերկրացիների մուտքի թույլտվությունը Հայաստան մեծացնում է կորոնավիրուսի վարակի տարածման ռիսկը, առավել ևս, որ այս պահին համաճարակային շատ լարված իրավիճակ է մեր հարևան Իրանում կամ Ռուսաստանի Դաշնությունում, որտեղից ամենամեծ ուղևորահոսքն ունենք դեպի Հայաստան։
Այս գործոնները վկայում են, որ արտակարգ դրության ռեժիմի մեղմացումը վաղաժամ է։ Մենք պետք է էականորեն բարելավեինք համաճարակային ցուցանիշները և միայն դրանից հետո գնայինք պետությունն ու տնտեսությունը ամբողջությամբ վերաբացելու քայլին։
Մինչդեռ մենք դա անում ենք, այո, որոշակիորեն մեղմացած, բայց ամենևին դեռևս ամբողջությամբ չկայունացած համաճարակային իրավիճակում։ Իսկ դա նշանակում է, որ արտակարգ դրության ռեժիմի այսօրվա մեղմացումները առաջիկա շաբաթներին, ամիսներին կարող են հանգեցնել համաճարակային ալիքի նոր բռնկումների, հատկապես, որ առջևում կորոնավիրուսի տարածման համար նպաստավոր աշնան ու ձմռան ամիսներն են։
Հասկանալի է, որ արտակարգ դրության ռեժիմի մեղմացման որոշումը պայմանավորված է բազմաթիվ գործոններով, փաստարկված տնտեսական ու այլ բնույթի հիմնավորումներով։ Մյուս կողմից, սակայն, այդ որոշումը չափազանց ռիսկային է։ Եվ որպեսզի արտակարգ դրության ռեժիմի այս մեղմացումները մեզ առաջիկայում չստիպեն վերադառնալ սահմանափակումների ավելի խիստ ռեժիմի, բոլորս պարտավոր ենք շատ ավելի աչալրջորեն ու զգոն կերպով պահպանել հակահամաճարակային կանոնները՝ վարակի տարածման տեմպի նվազման շարունակականությունն ապահովելու և, Աստված մի արասցե, վարակի երկրորդ՝ ավելի հզոր ալիք չունենալու համար։
Առողջություն ու Աստված պահապան Հայաստանը:
