ԱԺ պատգամավոր Արման Բաբաջանյանը Facebook-յան իր էջում գրում է․
«Ինչպես հայտնի է, «Հանուն Հանրապետության» նախաձեռնության անդամներով անցած ամսվանից այցելություններ ենք կատարել սահմամերձ/սահմանապահ բնակավայրեր՝ փորձելով գույքագրել այդ համայքների բնակիչներին հուզող առաջնային խնդիրները և մեր հնարավորությունների սահմաններում լուծումներ գտել դրանց համար։ Մեծ ուրախությամբ ցանկանում եմ տեղեկացնել, որ ավարտին են մոտենում Գեղարքունիքի մարզի սահմանապահ Արտանիշ համայնքի դպրոցի պատուհանների տեղադրման աշխատանքները և արդեն ամենամոտ ապագայում գյուղի աշակերտները հնարավորություն կունենան հաճախել ամբողջովին նոր պատուհաններով կահավորված դասասենյակներ։
Հակառակորդի ուղիղ նշանառության տակ գտնվող Արտանիշի դպրոցի համար այս խնդիրը չափազանց կարևոր է, քանի որ գյուղը գտնվում է եղանակային խիստ անբարենպաստ պայմաններում, արդեն հոկտեմբերից, ըստ էության, այնտեղ խստաշունչ ձմեռ է։
Եվ, չնայած, գյուղի դպրոցը ջեռուցվում է, սակայն հին պատուհանները հնարավարություն չէին տալիս պահպանել ջերմությունը, և երեխաները գործնականում գտնվում էին ցուրտ դասասենյակներում։
Մեր այցելության ընթացքում այս խնդիրը վեր հանվեց, մենք մեր ուժերով, ինչպես նաև ներգրավվելով այլ սուբյեկտների՝ կարողացանք դպրոցի 220 քառակուսի մետր ծավալով հին պատուհանները փոփոխել նոր եվրոպատուհաններով։ Այդ աշխատանքներում ներգրավվեց նաև Հայաստանի Էլեկտրական ցանցեր ընկերությունը՝ ՀԷՑ–ը, ինչի համար շնորհակալություն ենք հայտնում կազմակերպության ղեկավարությանը։
Երկիրը սկսվում է սահմանից, երկիրը պահվում է սահմանով։ Հետևաբար, ամենալավը՝ առաջին հերթին, սահմանին ու հատկապես սահմանին ապրող երեխաներին»։
