Հրապարակախոս, լրագրող Վասակ Դարբինյանը ֆեյսբուքյան իր էջում գրել է.

Կարդում եմ՝ ինչո՞ւ հեղափոխությունից հետո չի փոխվում դատական համակարգը, որ, օրինակ, Քոչարյանի նման հանցագործը ազատության մեջ է՝ քիչ է, դեռ աջուձախ էլ հարցազրույցներ է տալիս ու հոխորտում, առանց բարդույթների ի ցույց դնելով իր տգիտությունն ու ամբարտավանությունը…

Չի փոխվել մի պարզ պատճառով. որովհետև չկա փոխարինող: Որովհետև կոռումպացված, պատեհապաշտ, ծառայամիտ քննիչին, դատախազին, դատավորին, նույնիսկ՝ Սահմանադրական դատարանի դատավորին փոխարինելու հնարավոր թեկնածուները ոչ պակաս կոռումպացված, ոչ պակաս պատեհապաշտ, ոչ պակաս ծառայամիտ ու ոչ պակաս մորթապաշտ են, որքան էլ ցավալի լինի և որքան էլ անհավանական թվա:

Կա մեկ այլ պատճառ. այս ոլորտը և դատաիրավական համակարգի կարկառուն դեմքերը այնքան հիմնավոր ու անհուսալի են փչացած (ներողություն եմ խնդրում բացառություններից, որոնց, որպես կանոն, միշտ լուսանցք են մղում), այնքան են այլասերված, որ ոչ վեթինգը կփրկի, ոչ էլ անգամ ամենազոր բռնապետը, ամենառոմանտիկ առաջնորդը կամ ամենաերանելի ժողովրդավարը:

Նրանց մեծ մասը գիշատիչի բնազդով սպասում է, թե երբ է վերանալու իր գլխին կախված վտանգը, և երբ է ինքը դարձյալ հոշոտելու թույլին, անպաշտպանին, խոցելիին, երբ է ինքը դարձյալ կաշառք ստանալու, երբ է վերադառնալու խրախճանքի ճոխ սեղանին…

Միայն այս ամենը գիտակցելուց հետո է հնարավոր առաջին քայլն անել՝ համակարգն առողջացնելու: Դուք չեք կարող երկնքից հրեշտակներ իջեցնել ու նշանակել արդար դատավոր, անկաշառ դատախազ կամ պարկեշտ քննիչ: Ոչ էլ կարող եք ներմուծել նրանց, վտարելով հներին:
Միակ տարբերակը նրանց բացատրելն ու գլուխները մտցնելն է, որ չի լինելու վերադարձ անցյալին, զուգահեռաբար դա բացատրելով նաև Հայաստանի Հանրապետության բոլոր պատվախնդիր քաղաքացիներին և մտցնելով այդ բացատրությունը ամենքի գլուխները:
Թուլ չտալով, որ տմբտմբացնեն ի ծնե բախտի քմահաճույքին մատնված ու անպաշտպան իրենց գլուխները և հակառակը մտածեն: