Ջանք չի խնայվելու Արցախում արժանապատիվ և բարեկեցիկ կյանքի պայմաններ ստեղծելու համար․ Նիկոլ Փաշինյան

Ազգային ժողովում Կառավարության ծրագրի քննարկման ժամանակ վարչապետ Նիկոլ Փաշինյանը նշեց, որ Արցախի հետպատերազմական վերականգնումը, տնտեսական կյանքի աշխուժացումը, սոցիալ-տնտեսական խնդիրների լուծումը, մշակութային ու կրոնական խնդիրների լուծումը լինելու է կառավարության ուշադրության կենտրոնում։ Ջանք չի խնայվելու Արցախում արժանապատիվ և բարեկեցիկ կյանքի պայմաններ ստեղծելու համար։

Այս նպատակներին կառավարությունը հասնելու է Արցախի իշխանությունների հետ համագործակցության խորացման, ինչպես նաև Արցախի հետ գործակցության նոր ձևաչափերի ստեղծման միջոցով։ Դեռևս նոյեմբերի 18-ին ներկայացված ճանապարհային քարտեզով Արցախի վերաբերյալ նախատեսվախ բոլոր ծրագրերը լինելու են շարունակական։

2020 թ․ սեպտեմբերից սկսած մինչև օրս բնակչության սպառած էլեկտրաէներգիայի, գազի, հեռախոսակապի ծախսը ամբողջությամբ ֆինանսավորելու համար 2020 և 2021 թթ․ ընթացքում օետական բյուջեից նվիրաբերվել է 7.4 մլրդ դրամ, Արցախի հանրապետության ենթակառուցվածքային շինարարական աշխատանքները ֆինանսավորելու համար նվիրաբերվել է 1 մլրդ դրամ, պետական հատվածի աշխատակիցների աշխատավարձերը, կենսաթոշակներն ու նպաստները վճարելու, առողջապահական ծախսերը ֆինանսավորելու համար ՀՀ 2020 և 2021 թթ․ պետական բյուջեից Արցախի կառավարությանը տրամադրվել է 18 մլրդ դրամից ավելի բյուջետային վարկ։ Արցախում հաշվառված յուրաքանչյուր քաղաքացու, այդ թում՝ երեխաների, ինչպես նաև Արցախում չհաշվառված, բայց փաստացի բնակվող անձանց տրամադրվել է 68 հազար դրամի միանվագ օգնություն, Հայաստանում անշարժ գույք չունենալու դեպքում՝ տրամադրվել է հավելյալ 15000 դրամ աջակցություն։ Մինչև օրս աջակցություն է ստացել 100 հազարից ավել քաղաքացի, ընդհանուր վճարվել է 7.3 մլրդ դրամի գումար։