Հույս ունենք, որ նոյեմբերի 15-ից կանցնենք առկա ուսուցման. ԿԳՄՍ նախարարը՝ Նարեկ Բաբայանին

Այսօր՝ հոկտեմբերի 27-ին, Ազգային ժողովում Կառավարության հետ հարցուպատասխանի ժամանակ «Քաղաքացիական պայմանագիր» խմբակցության պատգամավոր Նարեկ Բաբայաի հարցն առնչվում էր դպրոցական արձակուրդները երկարաձգելու և բուհերում դասընթացները կրկին հեռավար կազմակերպելու խնդրին՝ կապված կորոնավիրուսի տարածման ուժգնացման  հետ: Պատգամավորը հետաքրքրվեց, թե ինչ գործիքակազմով է հնարավոր դա թույլ չտալ: 

Ի պատասխան ԿԳՄՍ նախարար Վահրամ Դումանյանը նկատեց. «Կարծում եմ՝ այդ հարցը շատ հստակ և սպառիչ պատասխան այսօր չունի, որովհետև իրավիճակը անկանխատեսելի է այս համավարակի հետ կապված: Մենք կողմ ենք առկա ուսուցմանը, բայց պայքար է գնում վիրուսի տարածման հետ, և մենք մեր ունեցած հնարավորություններով փորձում ենք դիմակայել»:

Նրա խոսքով՝ մոնիտորինգը, վերլուծությունները ցույց կտան, թե հետագայում իրենք ինչպես կվարվեն. «Մենք մինչև նոյեմբերի 15-ն ենք ասել առայժմ առկա դասընթացներ չկազմակերպել՝ հույս ունենալով, որ նոյեմբերի 15-ից կանցնենք առկայի, բայց մենք չենք կարող իմանալ, թե ինչպիսին կլինի իրավիճակը նոյեմբերի 15-ին: Նույնը՝ հանրակրթական դպրոցներում»: