1944թ. օգոստոսի 1-ին Աննա Ֆրանկը գրեց իր օրագրի վերջին էջը: 13-ամյա Աննան օրագիրն սկսել է գրել 1942-ի հունիսի 12-ին՝ իր ծննդյան օրը:
Հրեական ծագումով գերմանացի աղջնակը՝ Աննա Ֆրանկը, Հիտլերի իշխանության գալուց հետո ընտանիքով թաքնվում է Հոլանդիայում, որտեղ և գրում է իր հայտնի օրագիրը: Ընտանիքը ձերբակալվել է 1944 թվականին, Աննա Ֆրանկը մահացել է 1945 թվականի փետրվարին Բերգեն-Բելզենի համակենտրոնացման ճամբարում, 16 տարեկանում:
Հոլոքոսթի մասին պատմող ամենաազդեցիկ փաստաթղթերից մեկն առաջին անգամ հրատարակվել է պատերազմից երկու տարի անց՝ 1947 թվականին: Օրագիրը գտել, պահպանել և կարգավորել է Աննայի հոր աշխատակիցը՝ Միփ Գիսը, այնուհետև փոխանցել նրա հորը՝ Օտտո Ֆրանկին, որն ընտանիքից միակ փրկվածն էր։ Ի դեպ, Միփ Գիսը մահացավ 2010-ին, 100 տարեկանում:
Օրագիրը թարգմանվել է ավելի քան 60 լեզվով: Հայերեն առաջին անգամ թարգմանվել է 1962-ին ռուսերենից, 2017-ին թարգմանվեց անգլերենից, իսկ 2019-ին, Աննա Ֆրանկի ծննդյան 90-ամյակի առթիվ, հրատարկվեց օրագրի բնագրից՝ հոլանդերենից թարգմանությունը:
Հայաստանի ազգային գրադարանում կարող եք գտնել Աննա Ֆրանկի օրագրի թարգմանությունների տարբեր տարիների հրատարակությունները: Հոբելյանական տարեթիվը լավ առիթ է հայտնի օրագիրը բացելու կամ ևս մեկ անգամ թերթելու համար:
