Գերմանիան կանխատեսում է, որ ՌԴ-ից գազի դադարեցման դեպքում գազը կբավականացնի երկուսուկես ամիս

Գերմանիայի Դաշնային ցանցային գործակալության ղեկավար Կլաուս Մյուլլերը Bloomberg-ին ասել է, որ եթե մինչև նոյեմբեր Գերմանիան լցնի գազի պահեստարանների 95%-ը, ապա այդ ծավալները կբավականացնեն երկուսուկես ամսվա համար՝ Ռուսաստանից գազամատակարարման ամբողջական դադարեցման դեպքում։

Այժմ գազապահեստարանները 77%-ով լցված են։ Գերմանիան նախատեսում է մինչև հոկտեմբեր լրացնել 85%-ը, սակայն Մյուլլերն ասաց, որ դա դժվար կլինի անել սովորականից ավելի ցուրտ աշնանային կանխատեսումների և մատակարարման հետագա խափանումների դեպքում: Նա դժվար իրագործելի նպատակ է անվանել մինչև նոյեմբեր պահոցները 95%-ով լցնելը, քանի որ դրանցից մի քանիսը համալրելու համար ավելի երկար ժամանակ է պահանջվում:

«Ես չեմ կարող ձեզ խոստանալ, որ նոյեմբերին Գերմանիայում բոլոր պահեստարանները 95%-ով լցված կլինեն՝ նույնիսկ առաջարկի և պահանջարկի լավ պայմանների դեպքում: Լավագույն դեպքում նրանց երեք քառորդը կհասնի նպատակին»,- ասել է Կլաուս Մյուլերը։

Գերմանիան, որը մեծապես կախված է ռուսական գազից, սկսել է արագացված տեմպերով համալրել գազի պահեստարանները և հիմա նախատեսված գրաֆիկից երկու շաբաթ առաջ է ընկել: Գերմանիայի իշխանությունները դա արեցին այն բանից հետո, երբ Ռուսաստանը կտրուկ կրճատեց մատակարարումները «Հյուսիսային հոսք» առանցքային գազատարով: Գերմանիայի իշխանությունները բնակիչներին կոչ են արել նվազեցնել գազի սպառումը, զգուշացրել են ռացիոնալացման մասին և սահմանել տնային տնտեսությունների համար գազի օգտագործման հարկ:

Աղբյուրը՝ Meduza.io

Թարգմանեց՝ Աստղ Խաչատրյանը