Այս գիշեր՝ հունվարի 6-ին, 7.8 մագնիտուդ ուժգնությամբ երկրաշարժ է գրանցվել Թուրքիայի հարավ-արևելքում՝ Սիրիայի հետ սահմանին։ Ըստ էպիկենտրոնում ցնցումների ուժգնության՝ այն սեյսմիկ տեսանկյունից գնահատվում է «ավերիչ»։
Տեղի ունեցած ողբերգության կապակցությամբ ՀՀ վարչապետ Նիկոլ Փաշինյանը ցավակցական ուղերձ է հղել Թուրքիայի և Սիրիայի նախագահներին։
Հաշվի առնելով, որ հատկապես Թուրքիայի հետ յուրաքանչյուր կոնտակտ իր մեջ դիվանագիտական տարր է պարունակում՝ հարցն ավելի զգայուն է դարձնում հանրության համար։ Իհարե՝ այդ զգայունության հաշվին քաղաքական դիվիդենտներ հավաքող շրջանակներն առիթը բաց չեն թողնում այս քայլը իշխանության քննադատականի վերածելու համար։
Թեմայի շուրջ tiv1 – ը զրուցել է քաղաքագետ Ստեփան Գրիգորյանի հետ։
-Պարոն Գրիգորյան, ըստ Ձեզ ճի՞շտ էր Փաշինյանի կողմից ցավակցական ուղերձ հղելը Թուրքիայի նախագահին՝ դիվանագիտական տեսնակյունից։
-Իսկ ինչու՞ միայն դիվանագիտական, դա մարդկային առումով էլ ճիշտ քայլ է՝ մարդիկ երկրաշարժից զոհվում են, անտուն են դառնում, ցավակցությունը շատ տրամաբանական է, այն էլ՝ հարևան երկրին։ Այո՛, այդ երկրի հետ մենք չունենք դիվանագիտական հարաբերություններ, դեռևս չունենք նորմալացած հարաբերություններ, բայց այնուամենայնիվ մարդ ենք չէ՞։ Ես կարծում եմ այդ ցավակցական ուղերձը տեղին էր և ճիշտ։ Աշխարհաքաղաքական տեսանկյունից՝ էլի ճիշտ է, եթե թողնենք մարդկային գործոնը, զուտ քաղաքական, տարածաշրջանային զարգացման գործոնը՝ այդ կոնտեքստում էլ ճիշտ էր, քանի որ ակնհայտ է՝ Ռուսաստանը բաց դուրս եկավ մեր դեմ․ Լավրովի հարցազրույցը լուրջ մարտահրավեր էր նետված Հայաստանին։
-Հայաստանը պե՞տք է փրկարարական օգնություն առաջարկի Թուրքիային։
-Ես այդ քայլը համարում եմ էլ ավելի ճիշտ, քանի որ մեր փրկարար ջոկատները իրոք շատ լավ պատրաստված են ու կարող են օգտակար լինել, փրկել մարդկանց կյանքերը։ Ես կարծում եմ, դա որակական բան կտա, ուղղակի չգիտեմ՝ Թուրքիան կհամաձայնվի՞, թե՞ ոչ։ Իսկ այդ օգնության մասին ոչ թե հայտարարվում է, այլ քաղաքական, դիվանագիտական տարբեր խողովակներով շոշափում են, ու հետո արդեն հայտարարություն կարող են անել, որ մենք պատրաստ ենք մեր փրկարարական ջոկատները ուղարկել։
Հիշեցնենք, որ Թուրքիայում և Սիրիայում տեղի ունեցած ավերիչ երկրաշարժի հետևանքով, առնվազն 4 հայ է զոհվել Սիրիայում, երկուսը՝ Թուրքիայում։ Վերջին տվյալներով Թուրքիայում զոհերի թիվը կազմում է 1121, Սիրիայում՝ 783։
Մերի Մանուկյան
