«Հետքը» ուսումնասիրություն էր հրապարակել շուկայում լայն սպառում ունեցող ընկերությունների արտադրած կաթնաշոռի 10 նմուշների փորձաքննության մասին, որոնցից միայն 2-ն է համապատասխանել սահմանված նորմերին։
Հայտնաբերված խախտումների հետ կապված՝ Թիվ 1-ը կապ հաստատեց վերը նշված բոլոր ընկերությունների հետ, մեկնաբանություն ստանալու նշվածի վերաբերյալ։
«Մարիաննա» կաթնամթերքի արտադրական ձեռնարկությունից փորձեցինք կապ հաստատել հանրային կապերի պատասխանատուի հետ, սակայն հայտնեցին, որ վերջինս հեռախոսը մոռացել է աշխատավայրում և գնացել գործարան, և այսօր դժվար թե հեռախոսն իրեն հասնի։
«Արզնի» կաթնամթերքից հայտնեցին, որ այս պահին տնօրինությունը և հանրային կապերի պատասխանատուն գտնվում են Քաթարում, և իրավասու այլ անձ չկա, որը կպատասխանի մեր հարցերին։
«Բիոկաթ» ընկերության փոխտնօրենի համար առավել կարևոր էր առիթը, որին նա մասնակցում էր, և խնդրեց վաղը կապվել իր հետ․ պնդմանը, որ մամուլը և սպառողները մտահոգություն ունեն տեղի ունեցածի մասով, «․․․պատասխանատվություն չե՞ք կրում Ձեր սպառողների առջև․ «Տեղս հարմարեցնեմ, Ձեզ զանգեմ, լա՞վ»։
Ի վերջո՝ փոխտնօրեն Արմեն Հակոբյանը նշեց, որ արժանահավատ չեն համարում փորձաքննությունը․ «Մենք դեմ ենք դրան, որովհետև չգիտենք՝ ինչ պայմաններում է իրականացվել փորձաքննությունը»։
«Բոնիլատ» ՍՊԸ-ից վաճառքի պատասխանատուն, որը չցանկացավ ներկայանալ անուն-ազգանունով, նշեց․
«Այդ նմուշառումները, որոնք իրենք վերցրել են՝ արդեն չկան, որ կարողանանք ապացուցել, բայց կարող եմ ասել, մեր գործարանից յուրաքանչյուր դուրս եկած խմբաքանակ մեր լաբորատորիայում ստուգվում է»։
«Չանախ» և «Աշտարակ կաթ» ընկերություններն այդպես էլ մեր զանգերն անպատասխան թողեցին։
«Երեմյան Փրոդուքթս»-ն էլ հանդես է եկել հրապարկմամբ, որտեղ նշել է, որ պատրաստ են հրապարակային ստուգումների և պատասխանատու են իրենց արտադրանքի բարձր որակի համար։
Մերի Մանուկյան
