Զելենսկին ցանկանում է «Թրամփից պաշտպանել» ամերիկյան աջակցությունն Ուկրաինային

Ուկրաինայի նախագահ Վլադիմիր Զելենսկին անվտանգության երաշխիքների կոչ է անելու ԱՄՆ-ին, որպեսզի Դոնալդ Թրամփի վարչակազմի՝ ընտրություններում հաղթանակի դեպքում Ուկրաինային չպարտադրվի կնքել ոչ շահավետ խաղաղության համաձայնագիր:

Նա կմեկնի ՄԱԿ-ի գլխավոր ասամբլեա, այնուհետև Վաշինգտոն՝ ներկայացնելու «հաղթանակի ծրագիրը», որը կոչված է Ռուսաստանին ստիպել բանակցություններ սկսել Ուկրաինայի հետ․ գրում է The Times պարբերականը:

«Զելենսկին ցանկանում է «Թրամփից պաշտպանել» ամերիկյան աջակցությունն Ուկրաինային։  Զելենսկու անվտանգության երաշխիքների կոչն ընդգծում է, որ Ուկրաինան չի կարող ընդունվել ՆԱՏՕ և այլ միջազգային դաշինքներ, մասնավորապես, դաշնակիցների միջև տարաձայնությունների պատճառով»․ -ասվում է հոդվածում։ 

Քննարկումներին մասնակցած արևմտյան դիվանագետներից մեկը նշել է, որ ամերիկյան նախագահական ընտրությունները մեծ նշանակություն ունեն ոչ միայն Ուկրաինայի համար:

Նշվում է, որ Զելենսկու ծրագիրը բաղկացած է չորս հիմնական կետերից.

• Արևմտյան անվտանգության երաշխիքներ տրամադրելու խնդրանք, որը նման կլինի ՆԱՏՕ-ին անդամակցելու ժամանակ փոխադարձ պաշտպանության մասին դաշնագրին։
• ՌԴ Կուրսկի մարզում գործողության շարունակություն՝ որպես տարածքային հաղթաթուղթ։
• Հատուկ ժամանակակից սպառազինություն տրամադրելու խնդրանք:
• Միջազգային ֆինանսական օգնություն Ուկրաինայի ավերված տնտեսության համար:

Նշվում է, որ Բայդենը դժվար թե հայտարարի, որ Ուկրաինային թույլ կտա Ռուսաստանի տարածքում օգտագործել մեծ հեռահարության հրթիռներ, ներառյալ՝ բրիտանական Storm Shadow-ը: