Հարիսի հաղթանակը էքզիստենցիալ սպառնալիք է Իսրայելի համար. Թրամփ

ԱՄՆ նախկին նախագահ Դոնալդ Թրամփը, ելույթ ունենալով Իսրայելի վրա ՀԱՄԱՍ-ի հարձակման տարելիցին նվիրված միջոցառման ժամանակ, հայտարարել է, որ նոյեմբերին իր ընտրվելը կամ պարտությունը կնշանավորի «Իսրայելի պատմության ամենակարևոր օրը», փոխանցում է Politico-ն։

Թրամփն իր մրցակից Քամալա Հարիսի հաղթանակը 2024 թվականին անվանել է էքզիստենցիալ սպառնալիք Իսրայելի համար.

«Եթե ցանկանում եք իմանալ ճշմարտությունը, ես հավատում եմ դրան։ Կարծում եմ՝ դուք նույնպես հավատում եք դրան: Եթե ​​մենք չհաղթենք այս ընտրություններում, դա կունենա հսկայական հետևանքներ»։

Թրամփը հերթական անգամ հայտարարել է, որ «հոկտեմբերի 7-ի հարձակումը երբեք չէր լինի, եթե ես լինեի նախագահ։ Վերջին երկու տարին ապացուցեց, որ թուլությունը միայն բռնություն և պատերազմ է ծնում»։

«Ես թույլ չեմ տա, որ հրեական պետությանը սպառնա ոչնչացում, ես թույլ չեմ տա հրեա ժողովրդի ևս մեկ Հոլոքոստ։ Ես թույլ չեմ տա սահմանել ջիհադ ընդդեմ Ամերիկայի կամ մեր դաշնակիցների, և ես կպաշտպանեմ ահաբեկչության դեմ պատերազմում հաղթելու Իսրայելի իրավունքը, և նա պետք է արագ հաղթի այն»,- ծափահարությունների ներքո ասել է Թրամփը։