ԱՄՆ-ը Իրանին հորդորել է չպատասխանել Իսրայելի հարվածներին

Հոկտեմբերի լույս 26-ի գիշերը Իսրայելի Պաշտպանության բանակը երեք փուլում օդային հարվածներ է հասցրել Իրանի ռազմական մի շարք օբյեկտների:

Ռազմագործողությունը հաջող իրականացնելու նպատակով իսրայելական օդուժը նախ հարվածներ է հասցրել Իրաքի եւ Սիրիայի ՀՕՊ համակարգերին։

Ըստ Իսրայելի ՊԲ պաշտոնական հաղորդագրության, ռազմագործողությանը ներգրավվել է շուրջ 100 ռազմական ինքնաթիռ: Այլ աղբյուրներ հայտնում են, որ գրոհին մասնակցել են ամերիկյան արտադրության F 35 կոծանիչներ:

Մինչ այդ ԱՄՆ-ը Գերմանիայի հենակայաններից Մերձավոր Արեւելք է տեղափոխել F -16 կործանիչների մի քանի էսկադրիլիա:

Միացյալ Նահանգների պաշտոնական ներկայացուցիչ Շոն Սեւեթը Իրանին հորդորել է շաբաթ օրը հասցված հարվածներին չպատասխանել:

Նրա գնահատմամբ՝ Իսրայելն ունի ինքնապաշտպանության իրավունք, պատասխանել է հոկտեմբերի 1-ի իրանական հրթիռակոծումներին, եւ «դա պետք է լինի երկու երկրների ռազմական ուղղակի դիմակայության վերջը»։

Իրանական աղբյուրները հայտնում են, որ Իսրայելի օդային հարձակումները «մասնակի վնասներ են պատճառել»՝ առանց կոնկրետացնելու, թե ինչ թիրախներ են խոցվել:

Իսրայելի ՊԲ-ն հայտնել է, որ գիշերային երեք փուլով իրականացված գրոհից մարտակն ոչ մի ինքնաթիռ չի տուժել, բոլորը վերադարձել են «մշտական տեղակայման օդանավակայաններ»:

Պարզ է, որ Իրանին օդային հարվածներ հասցնելու որոշում կայացվել է ԱՄՆ համաձայնությամբ:

Երկու օր առաջ Իսրայելում է գտնվել պետքարտուղար Բլիքենը: Վարչապետ Նաթանյահուից բացի նա բանակցություններ է վարել Իսրայելի պաշտպանության նախարար Գալանտի հետ:

Վաշինգտոնը տպավորություն է ստեղծում, թե Իսրայելը կարող է հարվածել Իրանի միջուկային օբյեկտներին եւ նավթային ենթակառուցվածքներին, բայց ամերիկյան դիվանագիտությանը հաջողվում է զսպել նրան:

Իսրայելական կողմը հայտնել է, որ օդային հարվածներից առավել տուժել է բալեստիկ հրթիռների եւ ԱԹՍ-երի արտադրությունը:

Արաբական աղբյուրները հայտնում են, որ հարձակումից ժամեր առաջ Ռուսաստանից «Իրանին հետախուզական տեղեկություններ են փոխանցվել»:

Արեւմուտքը պահանջում է, որ Իրանը դադարեցնի Ռուսաստանին ԱԹՍ-երի եւ բալիստիկ հրթիռների մատակարարումը:

Թիվ 1 սյունակ, Վահրամ Աթանեսյան