Շենգավիթի նախկին թաղապետի գործով ևս մեկ անձ է կալանավորվել

Շենգավիթի նախկին թաղապետ Ռազմիկ Մկրտչյանի գործով ևս մեկ անձ է կալանավորվել։ Այս մասին 24News-ի հարցմանն ի պատասխան հայտնեցին ՔԿ-ից։
«Հարուցվել է հանրային քրեական հետապնդում՝ Քրեական օրենսգրքի 46-196-րդ հոդվածով, որպես խափանման միջոց կիրառվել է կալանքը»,- ասաց ՔԿ խոսնակ Կիմա Ավդալյանը։

24News-ի տեղեկությունների համաձայն՝ կալանավորվածը Տաթևիկ Հակոբյանն է, որը մեկ ամիս առաջ հեռացվել էր ՔՊ-ից։ Ըստ մեր ունեցած տեղեկությունների՝ հեռացման պատճառը ուղիղ կապ ուներ վերջինիս մասնակցությամբ Շենգավիթի ՏԿ-ի նախագահ Տիգրան Մակարյանին ծեծելու միջադեպի հետ։

Ըստ մեր աղբյուրի՝ Տաթևիկ Հակոբյանն է Մակարյանին իր տուն հրավիրել, իբր թե ներկուսակցական հարցեր քննարկելու համար, որտեղ էլ վերջինիս սպասելիս է եղել Շենգավիթի նախկին թաղապետ Ռազմիկ Մկրտչյանը։ Մկրտչյանը աշխատանքային տարաձայնություններ ուներ Մակարյանի հետ:

Հիշեցնենք, որ աղմկահարույց միջադեպով պայմանավորված Շենգավիթի նախկին թաղապետ Ռազմիկ Մկրտչյանը կալանավորվել էր 2 ամսով։ Նշենք նաև, որ երկամսյա կալանքի ժամկետը շուտով կավարտվի։