Կորոնավիրուսի պանդեմիայի ժամանակ աշխարհի տարբեր երկրներում հակաճգնաժամային, կանխարգելիչ միջոցառումներ ձեռնարկվեցին: Դրանց մեջ է մտնում անհատական պաշտպանիչ միջոցների՝ դիմակների և ձեռնոցների պարտադիր կրումը: Հատկանշական է, որ Առողջապահության համաշխարհային կազմակերպությունը ի սկբանե չէր պարտադրում դիմակ կրել, սակայն հիմա վերջինս դարձել է պարտադիր աշխարհի բազմաթիվ երկրներում: Իսկապես, դիմակ կրելը էականորեն նվազեցնում է վարակի տարածումը: Դիմակները տնից դուրս ամենուր կրելը այս պահին պարտադիր է Բոսնիա Հերցոգովինայում, Կուբայում, Վիետնամում, Վենեսուելայում, Արաբական Միացյալ Էմիրություններում, Մարոկկոյում, Եթովպիայում, Բուրկինա Ֆասոյում, Քենիայում, Ռուանդայում և Զամբիայում: Այս պահին դիմակ կրելու պահանջը խիստ է նաև եվրոպական երկրներում: Օրինակ՝ Գերմանիայի որոշ շրջաններում դիմակ չկրելու համար հասնում է մինչև տասը հազար եվրո տուգանք: Գերմանիայի իշխանությունները վստահ են, որ այդ պատճառով է, որ իրենց երկրում հիմա վարակի ցածր ցուցանիշներ կան:
Իսպանիայում ևս դիմակ կրելը պարտադիր է ամենուր, իսկ կարգազանցները պիտի վճարեն հարյուր եվրո տուգանք: Ֆրանսիայում դիմակ կրելը պարտադիր է միայն հասարակական տրանսպորտում և փակ վայրերում, նույն պատկերն է նաև Ավստրիայում, Գերմանիայում, Նիդերլանդներում, Բելգիայում, Լեհաստանում: Դիմակ կրելը պարտադիր է նաև Հունաստանում, Պորտուգալիայում, Ռումինիայում, Իտալիայում, Սլովենիայում, այլ կերպ ասած, եվրոպական գրեթե բոլոր երկրներում: Եվրոպայից բացի պարտադիր դիմակ են կրում, ԱՄՆ-ում, Սինգապուրում, Չինաստանում, Հարավային Կորեայում, Իսրայելում:
Ռուսաստանում դիմակ կրելը պարտադիր է միայն փակ տարածքներում, իսկ մաքուր օդին պարզապես խրախուսվում է կրել պաշտպանիչ միջոցներ: Դիմակների կրումը պարտադիր է նաև մեր հարևան երկրներում՝ Ադրբեջան, Վրաստան, Իրան, Թուրքիա:
Այս պահի դրությամբ կորոնավիրուս է հայտնաբերվել աշխարհի 213 երկրներում, որտեղ որոշակի վայրերում պարտադիր է դիմակ կրելը: Ըստ էության՝ դիմակ կրելը միայն պարտադիր չէ այն երկրներում, որտեղ համավարակ չկա՝ Հյուսիսային Կորեա, Թուրքմենստան և Աֆրիկյան մի շարք պետություններում՝ Կոնգո, Պալաու, Սամոա, Թուլավու և Սոլոմոնյան կղզիներ:
Նելլի Խաչատրյան
