Արցախում որևէ խանութ թալանված չէ, անգամ նրանք, որոնց ապակիները կոտրված են

Ստեփանակերտում աշխատող արտասահմանցի լրագրողները զարմացած են, որ օրեր շարունակ խանութները փակ են, բայց որևէ խանութ թալանված չէ, անգամ այն խանութները, որոնց ապակիները կոտրված են։ Այս մասին ֆեյսբուքյան գրառմամբ պատմել է լրագրող, իրավապաշտպան Արման Ղարիբյան:

«Լրագրողներից մեկը տեսել էր, թե ինչպես են մարդիկ մտնում խանութ, վերցնում՝ ինչ իրենց պետք է, և թողնում գումարը խանութում, թեև գիտեն, որ խանութպանը քաղաքում չէ։ Ոչ մի այլ երկրում նման բան չեն տեսել, հատկապես պատերազմող երկրում»,- պատմել է նա եւ նշել, որ Ստեփանակերտի իշխանությունները սա բացատրում են ոչ միայն մարդկանց բարեխղճությամբ ու համախմբվածությամբ, այլև նրանով, որ քաղաքապետարանը մատակարարում է անհրաժեշտ սնունդ բնակչությանը, այդ հարցում ի դեպ, Ստեփանակերտին օգնում է նաև Երևանի քաղաքապետարանը։

Լրագրողը նշել է, որ այս մասին շուտով մի նյութ կհրապարակվի միջազգային մեդիայում: