Վինսենթ վան Գոգ. «Արևածաղիկներ». դասախոսություն Art Discovery

Համաշխարհային արվեստի պատմության ընթացքում ստեղծվել են հազարավոր ստեղծագործություններ. ճարտարապետության, գեղանկարչության, քանդակագործության, գրաֆիկայի, դեկորատիվ-կիրառական արվեստի օրինակներ, որոնց մեջ առանձնանում են մի շարք ստեղծագործություններ: Դրանք ճանաչում են բոլորը, սիրում են բոլորը: Այդ ստեղծագործությունների շուրջ են ծավալվում ամենաբուռն քննարկումները. կարծիքներ են հնչում, որ այդ գործերի այսչափ ճանաչված լինելը լավ PR-ի արդյունք է, լինում են հակադիր կարծիքներ՝ երկար վերլուծություններով, որոնք «ապացուցում են» այդ ստեղծագործության արդարացիորեն հռչակված լինելը:
Ինչու՞ են այդ ստեղծագործությունները համարվում գլուխգործոցներ, ինչու՞մն է նրանց ահռելի հռչակի գաղտնիքը. ահա, մեր այս դասախոսությունների շարքը նվիրված է լինելու նման ստեղծագործությունների վերլուծությանը, յուրաքանչյուր դասախոսության ընթացքում մենք փորձելու ենք պատասխան գտնել վերը նշված հարցերի համար:
Եվ այս շարքի երկրորդ դասախոսությունը նվիրված է լինելու հանճարեղ գեղանկարիչ Վինսենթ վան Գոգի «Արևածաղիկներ» ստեղծագործությանը:
Խոսելով Վինսենթ վան Գոգի մասին, շատերն են նշում, որ այս նկարչի իրենց սիրելի ստեղծագործությունը «Արևածաղիկներն» են, իսկ երբ նրանց հարցնում ես, թե ո՞րը, զրուցակիցը հաճախ զարմանում է: Պարզապես Վան Գոգի «Արևածաղիկներ» անունով ստեղծագործություններն իրականում մի քանիսն են, դրանք ինն են կամ տասը, ներառյալ՝ փարիզյան շրջանի գործերը: (Մեկ՝ Ճապոնիայում պահպանվող «Արևածաղկի» բնօրինակը լինելու վերաբերյալ մասնագետների մի խումբ կասկածներ ունի):

Աղբյուրը՝ Art Discovery