ՔՊ կուսակցության հասարակայնության հետ կապերի համակարգող Վահագն Ալեքսանյանը ֆեյսբուքյան իր էջում գրել է․
Շատ ընկերներ հարցնում են, թե ի՞նչ է պետք անել, որպեսզի «Իմ քայլը» խմբակցությունը լքած պատգամավորները նաև մանդատները դնեն, քանի որ ինչպես իրենք են պնդում՝ նրանք ընտրվել են բացառապես որպես դաշինքի մաս, Նիկոլ Փաշինյանի թիմի անդամ և ոչ որպես անհատ պատգամավոր։
Կարճ կպատասխանեմ՝ ոչինչ։
«Իմ քայլը» խմբակցությունը լքած երեք պատգամավորները պետք է մնան ԱԺ-ում որպես անկախ պատգամավորներ, որպես սիմվոլի՛կ անկախ պատգամավորներ։ Անկախ պատգամավորներ, որոնք պիտի խորհրդանշեն քաղաքական ապերախտությունն ու դավաճանությունը։ Անկախ պատգամավորներ, որոնք հետագայում իրենց ներկայությամբ խարան են լինելու ցանկացած քաղաքական թիմի համար՝ թիմը միանգամից դասակարգելով որպես ոչ վստահելի ու ոչ հուսալի։
Այդ երեք անունները քաղաքական դաշտում այսու միայն կծու քմծիծաղ են առաջացնելու և դա հետապնդելու է վերջիններիս իրենց հետագա ողջ կարիերայի ընթացքում, նույնիսկ քաղաքականությունից դուրս։
