«Հաղթանակ» զբոսայգու անմխիթար վիճակի մասին բազմիցս է խոսվել: Եթե մեր քաղաքապետը և իր կրեատիվ տեղակալը գեթ մեկ անգամ շրջեին զբոսայգու տարածքում, մասնավորապես լճից մինչև «Արագիլ» ռեստորան, քայլեին դեռևս Սովետական Հայաստանում վերանորոգված ճեմուղիներով, տեսնեին այն կեղտոտ, բարձիթողի և մայրաքաղաքին ոչ հարիր վիճակը, լսեին այն անճաշակ երաժշտությունը, որ հնչում է այգում… կանգնեին, մտորեին ու փորձեին հասկանալ՝ ո՞րն է քաղաքային իշխանության դերը, առաքելությունը և մեղավորությունը:
Եթե դուք, իր նշանակությամբ, տեղով ու բուսականությամբ՝ քաղաքի թիվ 1 զբոսայգին աչքաթող եք անում և նախկինների նման թաքնվում անոսկոր պատճառաբանությունների հետևում, ուրեմն իրավացի էին այն մարդիկ, ովքեր ի սկզբանե ասում էին, որ դուք չեք կարող, իսկ մենք, փաստորեն, սխալվեցինք: Ինչևէ, քաղաքապետարանի բերած արգումենտը հետևյալն է՝ տարածքն ունի 3 սեփականատեր և այլն, բլա, բլա, բլա…
Հարգելի քաղաքապետ, Դուք և Ձեր թիմը ոչ միայն կառավարման, այլև բանակցելու և պայմանավորվելու հմտություններ չունեք: Երկարաժամկետ ծրագրերի դեպքում դեռևս կարողանում եք սպասեցնել, իսկ այս դեպքում՝ ի ցույց է դրվում ձեր մարտավարության ողջ սնանկությունը:
Լավ, այգու տերերը տարբեր մարդիկ են, իսկ դու՛ք, դու՛ք ո՞վ եք: Հանրային շահ ներկայացնող տարածքը 80-ականների մարզային լքված այգի է հիշեցնում: Եթե դուք սեփականատերերին կառավարման և մոդերնիզացիայի մեկ միասնական կոնցեպտ չեք կարողանում պարտադրել, ապա ո՞րն է ձեր առաքելությունը: Քաղաքն ունի տեր, և այդպիսի նշանակություն ունեցող այգին չի կարող և չպետք է լինի այդ վիճակում: Երբևէ փորձե՞լ եք ձեր հյուրերին տանել Կասկադ համալիրի վերնամասի տեսահարթակ և ցույց տալ Երևանը: Չանե՛ք այդպիսի բան, քանզի կխայտառակվեք: Երևանն իրավունք ունի լինել ավելի լավը: Ձեր թիմի անփառունակ, կաբինետային, և կիսաքայլեր ենթադրող աշխատանքները օր օրի հիասթափեցնում են ձեզ ընտրողներին: Դուք չեք տիրապետւմ քաղաքին և քաղաքի խնդիրներին:
Հ. Գ. Քայլեք «Մոնումենտում» երեկոյան և մտածեք, երկար մտածեք:
