Թուրքիան օգոստոսի 9-ին կվերսկսի Միջերկրական ծովում գազի հետախուզումը, ինչը հաստատել է Թուրքիայի էներգետիկայի նախարարությունը։ Գազի հետախուզումը կիրականացնի թուրքական «Ադբուլհամիդ Հան» արդյունահանող նավը։
Նախարարության հաղորդագրության մեջ ասվում է. «Թուրքական «Ադբուլհամիդ Հան» արդյունահանող նավը օգոստոսի 9-ին առաքելություն կսկսի Միջերկրական ծովում՝ մեկնելով Մերսին նավահանգստից։ Հատկանշական է, որ Թուրքիան և Հունաստանը տարաձայնություններ են ունեցել մի քանի հարցերի շուրջ, այդ թվում՝ Միջերկրական ծովում ածխաջրածինների պաշարների շուրջ:
Սակայն դեռ պարզ չէ, թե որտեղ են անցկացվելու արդյունահանումները։ Անցյալ շաբաթ թուրք բարձրաստիճան պաշտոնյան ասել էր, որ գազի հետախուզումը կիրականացվի բաժանված Կիպրոս կղզու մոտ, հաղորդում է AFP-ն։ 2020 թվականին Եվրամիությունը պատրաստվում էր պատժամիջոցներ կիրառել Թուրքիայի նկատմամբ՝ կապված Արևելյան Միջերկրական ծովի վիճելի ջրերում գազի հետախուզման փորձերի հետ:
Երկու երկրներն էլ ՆԱՏՕ-ի անդամ են։ Հունաստանի և Թուրքիայի միջև լարվածությունն աճեց Էգեյան ծովի կղզիների կարգավիճակի և օդային տարածքի խախտումների հետ կապված։ Անկարան Աթենքին մեղադրել է կղզիներում գաղտնի ռազմակայաններ ստեղծելու մեջ։
Այս տարվա սկզբին՝ մարտին, Թուրքիայի նախագահ Ռեջեփ Թայիփ Էրդողանը խզեց դիվանագիտական հարաբերությունները Հունաստանի վարչապետ Կիրիակոս Միցոտակիսի հետ՝ ԱՄՆ կատարած այցի ժամանակ Թուրքիային F-16 կործանիչների վաճառքին դեմ արտահայտվելու համար։
Երկու ժողովուրդները հակասում են նաև Կիպրոսի հարցում: Կիպրոս կղզին մասնատվել է, երբ թուրքական ուժերը գրավել են կղզու հյուսիսային մասը 1974 թվականին: Թուրքական ուժերը ներխուժեցին Կիպրոս՝ ի պատասխան ռազմական հեղաշրջման, որը հովանավորվում էր Հունաստանում այդ ժամանակ իշխող խունտայի կողմից:
Ներխուժումից հետո հյուսիսային մեկ երրորդ հատվածը դարձավ Հյուսիսային Կիպրոսի ինքնահռչակ թուրքական Հանրապետություն(ՀԿԻՀ): Այն ճանաչում է միայն Անկարան։ Մինչդեռ կղզու հարավային հատվածը հունախոս է և նաև ԵՄ անդամ է։
Աղբյուրը՝ timesnownews.com
Թարգմանեց՝ Աստղ Խաչատրյանը
