Խաղադրույքների ծավալը հասել է 6.3 տրլն դրամի

ԱԺ ՔՊ խմբակցության պատգամավոր Հայկ Սարգսյանը հայտնել է, որ 2010թ. համեմատ խաղադրույքների ծավալն աճել է 440 անգամ։

«Եթե 2010թ. ինտերնետ շահումով խաղերում կատարված խաղադրույքների ծավալը կազմում էր շուրջ 14 մլրդ դրամ, 2023թ․ այն ավելացել է ավելի քան 440 անգամ՝ հասնելով 6.3 տրլն դրամի, մինչդեռ հավաքագրվող հարկերն ու տուրքերն աճել են ընդամենը 26 անգամ։ 2010թ. 14 մլրդ դրամ շրջանառությունից հավաքագրվել է 1 մլրդ հարկ, 2023թ՝ 6.3 տրլն դրամ շրջանառությունից հավաքագրվել է 33 մլրդ դրամ հարկ»,- ասել է նա ԱԺ տնտեսական հարցերի մշտական հանձնաժողովի նիստում։

Նա նշել է, որ քայլեր են ձեռնարկվել, որոնք միտված են եղել ոլորտի սահմանափակմանը, սակայն, բավարար արդյունք չեն ունեցել, և անհրաժեշտ է հարկային բեռը կրկին բարձրացնել։ Նա առաջարկել է օրենսդրությամբ սահմանել, որ բացի առկա հարկերից ու տուրքերից, ոլորտի համար սահմանվի նաև 10% շրջհարկ։

Նա նաև նշել է, որ 2010-16թթ. ոլորտում խաղադրույքների ծավալն աճել է 11 անգամ, 2016-18թթ՝ 1.94 անգամ, իսկ 2018-23թթ․՝ 20 անգամ։